Жития святых страстотерпцев Бориса и Глеба

Акафист
святым и благоверным князьям и страстотерпцам
Борису и Глебу

Правдивая страстотерпцы и истинныя Евангелия Христова послушатели, целомудренный Романе с возлюбленным Давидом, не сопротив стаста врагу сущу брату, убивающему телеса ваша, душам же коснутися не могущу: да плачется убо злый властолюбец, вы же радующеся с лики ангельскими, предстояще Святей Троице, молитеся о державе сродников ваших, Богоугодней быти, и сыновом Российским спастися.

Тропарь, глас 4

Мученическою кровию порфиру окропивше светло, украшени предстоите, страдальцы славнии, Царю Безсмертному, и, венцы славы от Него приимше, молитеся стране нашей подати на враги одоление и душам нашим велию милость.

Избраннии и всехвальнии страстотерпцы Христовы Борисе и Глебе, благословеннии чада просветителя нашего равноапостольнаго Владимира, от идольскаго нечестия в чудный свет веры Христовы пришедшии, и кровь пролиявшии за веру во Христа Бога нашего, похвальная пения вам приносяще, мы, недостойнии, во гресех и скорбех наших прибегаем к вашему заступлению, вы же яко дерзновение имущии ко Господу, молите Его, Всеблагаго Царя Славы, даровати милость почитающим святую вашу память и во умилении сердца поющих вам:

Радуйтеся, Борисе и Глебе, великии и славнии страстотерпцы.

Ангельски поживше на земли, венец мученический улучили есте, святая братия по плоти Борисе и Глебе, все упование свое возложивши на Господа, от руки братней, яко овчата незлобивая, заклани бывше, всех себе, своя души и юная телеса Господу предали есте; сего ради, ублажая всечестную вашу память, от всея души нашея воспеваем вам: Радуйтеся, незлобивии агнцы, Господу, яко овча на зaколение веденному подражавшии; радуйтеся, кротции голубие, заповедь Христову в кротости сохраншии. Радуйтеся, от руки брата по плоти смерть без ропота приявшии; радуйтеся, Авелю ветхозаветному, рукою брата убиенному, уподобившиися. Радуйтеся, венцем небесныя славы увенчаннии; радуйтеся, онаго венца небеснаго мученьми достигшии.

Радуйтеся, Борисе и Глебе, великии и славнии страстотерпцы.

Весть о кончине отца своего великаго Владимира слышавши, святый князь Борис много плакашеся, глаголя: “Увы мне, отче мой, свете очию моею, сияние и заре лица моего, увы мне, како зашел еси свет мой, не бывшу мне при твоем скончании, да сам честное твое погребл тело, почто не сподобился лобызати честная седины твоя, отче мой”. Таковым рыданием много тужаше на брезе реки Альты, идеже стояще с воинством; во время же сие Святополк, Каину подобный, брат сый, умышляше: погублю братию мою всю и единовластвовати буду. Собра же убийцы, повеле им убити тебе, святый Борисе; ты же сего лукаваго брата своего почитал еси, воздавая честь ему, яко старейшему, и смерть от него прияв, Богу за вся воспевал еси: Аллилуиа.

Разум Божественный испроси нам, святый Борисе, еже подражати, якоже и ты, Господу рекшему: “Не убойтеся убивающих тело, души же не могущих убити”, и в саду Гефсиманстем волею в руце мучителей вдавшемуся, ты бо, всеблаженне страстотерпче, не сопротив стал еси врагу, сущу брату твоему, и по услышании яко хочет тя убити, стояшу бо ти на Альте реце рекоша киевскии бояре: “Гряди в Киев и сяди на престоле отчем, се бо и вои отчии с тобою суть”, ты же рекл еси им: “На старейшаго брата не иду, его же, яко отца имам”. Слышавше убо сия, разыдошася вси, точию ближняя слуги осташася с тобою, с ними же шел еси ко брату твоему Святополку еже поклонитися яко старейшему князю; сретше же на сем пути твоем вестник некий глаголаше ти о злом умышлении Святополковом: сему такожде не ял веры, ведуще себе ни в чесомже согрешивша противу брата твоего. Ведуще убо сия добрая нрава твоего, вкупе с блаженным братом твоим Глебом, вопием вам: Радуйтеся, кротции агнцы противу вепря, брата, ничем же противуставшии; радуйтеся, чистии сердцем праведницы ничтоже злое о нем помышлявшии. Радуйтеся, велиции исповедницы имене Христова даже до крове вашея; радуйтеся, земнии ангели, чистотою душ ваших небесных чертогов достигшии. Радуйтеся, мира сего мученицы, горних же высот блажени насельницы; радуйтеся, мира дольняго странницы, горняго же блаженства вечнии наследницы.

Радуйтеся, Борисе и Глебе, великии и славнии страстотерпцы.

Силою Вышняго укрепляем, небоязненно приял еси смерть, блаженне Борисе, молитвою и верою в Создателя своего быв укреплен, аще же яко человек и тужил еси, обаче и Сам Господь Иисус Христос в нощь лютых страданий в Гефсимании моляшеся со слезами до пота кровава; своему убо Владыце уподобляяся, и ты печалию одержим быв, но возложивши все упование свое на Господа, в день той же бяше суббота, вшед в шатер свой молился еси плачем Христу Богу и Пречистой Богоматери, во утрии же недели, певаемей утрени, весть приим яко убийцы твои близ есть ждуще молитвы твоей скончания, прилежне молился еси и егда совершися служба Божественная всего себе предав воле Творца всяческих, Ему же за вся воспел еси: Аллилуиа.

Имуще душу твою устремленную в горняя в чаянии смерти ты, святый Борисе, прилежнее убо начен молитися глаголя: “Господи, что ся умножиша стужающии ми, мнози востают на мя”, — и прочее псалма того и паки чтуще псалтырь со многим умилением, глаголаше псалом оный, в нем же суть словеса сия: “К тебе привержен есмь от ложесн, от чрева матере моея. Бог мой еси Ты, да не отступиши от мене, яко скорбь близ, яко несть помогаяй ми; Ты же Господи, не удали помощь Твою от мене, на заступление мое вонми”, — и прочая псалтыри Давидовы, от нея утешение почерпая и подавая образ терпения во злостраданиих и еже вяшще поучатися в Законе Господни день и нощь. Сего ради тебе и святому брату твоему Глебу во умилении сердца глаголем: Радуйтеся, яко крини сельнии, во утрии дне жития дерзновенно урезаннии; радуйтеся, красотою чистых душ ваших паче оных украшеннии. Радуйтеся, гроздие винограда Божественнаго, кровь вашу аки вино и жертву Господеви источившии; радуйтеся, древа светлоплодовитая, рая всечестнаго шумом листвий своих Содетеля всех отверзти врата молящая. Радуйтеся, древа, псалмопевцам воспевая, плодами духовными любве и веры Церковь возвеселившая. Радуйтеся, двоице святая, во псалмех воспитанная сладчайшими псаломскими словесы в час смертный укрепленная.

Радуйтеся, Борисе и Глебе, великии и славнии страстотерпцы.

Бурею скорбных помышлений одержим бе святый Борис по скончании утренняго пения и взирая на икону Христову, с плачем глаголаше: “Господи Иисусе Христе, сим человеческим образом явлейcя на земли спасения ради нашего и изволивый на Кресте пригвоздитися грехов ради наших, ты и мене сподоби о имени Твоем претерпети страдание сие, еже не от сопротивных, но от брата моего приемлю неповинно, и не постави ему, Господи, в грех сего”. Таковей молитве, великий страдальче Борисе, дивящеся, да сподобимся и мы грешнии подражати тебе, якоже ты Господу на Кресте возносимому, глаголавшему: “Отче, отпусти им, не ведят бо, что творят”, и первомученику архидиакону Стефану, камением побиваему бывшу и вопиявшему: “Господи, не постави им греха сего”, и подражая тебе, воспеваем присно песнь хваления за вся Господу: Аллилуиа.

Слышавше сия молитвенная и кроткая о мучителех своих глаголы святаго Бориса, жестокосердии убийцы никакоже умягчишася, но паче исполняхуся злобою и яко зверие лютии внезапу нападоша на тя, святый страдальче, со оружием, обнаженными мечи и копии и ударив тя прободоша и повергоша на землю. Сие убо воспоминая, содрогаемся, и тебе, и блаженному Глебу похвальная восписуем сия: Радуйтеся, велиею любовию пламеневшии даже до крове; радуйтеся, веру до лютаго скончания жития вашего непорочно сохраншии. Радуйтеся, словом и житием своим агнца Христа велегласно проповедавшии; радуйтеся, и сами за Него заклани бывше якоже агнцы. Радуйтеся, от временныя жизни сея преставившиися к жизни нестареямей; радуйтеся, от суетныя скорогибнущия славы преселившиися ко славе вечней.

Радуйтеся, Борисе и Глебе, великии и славнии страстотерпцы.

Чужде убийцем милосердие воистину, егда заклавши тя, святе Борисе, нечестивии, зря тя повержена на земли, абие взяша и обвивше в шатер якоже плащаницею, возложиша на колесницу и везоша с собою и сретоша два варяга посланнии от Святополка и тии приникше видеша еще дышуща, обаче сие подвиже их паче на ярость и извлек един от них меч свой вонзе в сердце твое и тако скончался еси, о великий мучениче, от зверонравных людей люте терзаемый, Господу же Мздовоздаятелю воспевший немолчно: Аллилуиа.

Узре смерть святаго Бориса, верный слуга его Георгий, паде на тело господина своего и сице глаголаше: “Не ocтавлю тебе, господине мой любимый, но идеже красота тела твоего увядает, тамо и аз скончаю живот мой”. И сия убо любовь слуги никакоже коснуся злых сердец: вземше убо копия прободоша и Георгия якоже и Бориса, таже Иудину нраву поревноваше, прельщени бывше златою гривною на выи Георгиевой, даром Бориса верному рабу своему, иже сняти никакоже бе мощно, отсекоша того ради главу Георгиеву и мнози отроцы Борисовы таможде побиени бывше, сострадальцы господину своему явишася. Сие лютое дело чад сатанинских умными очима нашима созерцая, благоговейне поем мученицем: Радуйтеся, Борисе и Глебе, святыя Руси новии страстотерпцы; радуйтеся, прославлениии в лице святых мученик. Радуйтеся, и с собою приведшии лик сострадальцев; радуйтеся, увенчаннии нетленною славою мученических венцев в горних обителех. Радуйтеся, земную плачевную юдоль пренебрегшии, зря умными очима славу небеснаго чертога; радуйтеся, онаго чертога достигшии и венец победы от Христа приявшии.

Радуйтеся, Борисе и Глебе, великии и славнии страстотерпцы.

Проповедует мир христианский величие страданий святых мучеников Бориса и Глеба, имея их, яко путеводителей своих к Горним Селениям, глаголет бо святый Симеон Метафраст, списатель деяний святых Божиих, яко: “Жития и подвиги святых подобятся светлости звезд, якоже бо звезды положением на небеси утверждени суть, всю же поднебесную просвещают, тыяжде и от индиан зрятся, не сокрываются и от скифов, землю озаряют и морю светят, плавающим корабли управляют, ихже имен аще и не вемы, множества ради, обаче светлей доброте их чудимся, сице светлость святых, аще и затворены суть мощи их во гробех, но силы их в поднебесней земными пределы не суть определены”. Чудимся тех житию и удивляемся славе, юже Бог угодившия Ему прославляет, воздвигая и нас хладных ко славословию имени Его пети со умилением: Аллилуиа.

Светом Троическим просвещаемии в горних обителех души мученическая, выну предстоящии Престолу Того, за Него же лютыя муки претерпеша на земли, свыше от оных горних чертогов молитвами своими ниспосылают нам от Творца всяческих мир и благоденствие, аще токмо память их чтим и просим помощи их усердно, не усты токмо, но и паче сердцем, почитая тако и память святых страстотерпцев Бориса и Глеба, во умилении сердечном глаголем: Радуйтеся, доблестнаго лика мученическаго светлое сияние; радуйтеся, всего рода христианскаго славо и украшение. Радуйтеся, добродетелей евангельских честная вместилища; радуйтеся, взыскателие небеснаго вечнаго сокровища. Радуйтеся, венцем вечнаго веселия на Небеси увенчаннии; радуйтеся, и нас сущих на земли помощию своею не оставляющии.

Радуйтеся, Борисе и Глебе, великии и славнии страстотерпцы.

Мира суетнаго сладости ни удержаша вас на земли, мученицы святии Борисе и Глебе, от княжеския славы ко славе вечней прешедше, оную бо вечную святую красоту небес умными очима зрели есте. Ея сладости лютым путем мучения достигосте и тамо во Храме Небесныя дивныя Божия славы, у Престола Вседержителя Бога, воспеваете выну: Аллилуиа.

Егда прободен бе святый Борис и тайно без единыя почести погребен в Вышгороде, Святополк зверонравный помышляше в себе, како и Глеба убити; сей же убо Глеб от единыя со святым Борисом матере сын бе Владимиру, юн сый, нравом кроток, тих и незлобив. Сему убо княжащу в Муроме, посла Святополк лестно глаголюще: “Отец велми болит и зовет тя к себе, хотяще видети тебе, гряди убо борзяся в малей дружине”. Вняв убо сим глаголам, Глеб святый скоро потщися иде в Киев, не испытуя вести сия, любяще бо отца своего и крепким желанием горя облобызати его честныя седины. Мысленне воспоминая сие скорое твое течение ко смерти, тебе и брату твоему Борису умильно зовем: Радуйтеся, лестию уловленныя и к смертному пределу земныя жизни вашея скоро текшия; радуйтеся, лютыми страданьми небеснаго покоя достигшии. Радуйтеся, о телесех своих всячески небрегшии; радуйтеся, души ваша Господеви приобретшии. Радуйтеся, земную плачевную юдоль без сожаления оставльшии; радуйтеся, небесную славу улучити сподобльшиися.

Радуйтеся, Борисе и Глебе, великии и славнии страстотерпцы.

Странно есть людем христолюбивым видети, како брат окаянный избившаше братию за почести Великаго на Руси князя и богатство многих градов и областей, но таковы убо мысли людей нечестиваго века сего, и таковы козни людей, яже не Богу служат, не о Бозе помышляют, но похотем своим и миру погибельному усердно работают, в помрачении ума и сердца своего дерзкия хулы изрыгая на Господа Творца всяческих, мы же благоговейно почитая память мучеников, Богу Благодетелю нашему вопием выну песнь хвалы: Аллилуиа.

Весть прием oт сестры своея Предиславы из Киева, брат святых мученик Ярослав, князь Новгорода, вознести святому Глебу о лукавствии Святополка, текущу же скоро в Киев Глебу и пришедшу ему на устие Волги, нощию потчеся под ним конь в рове и вреди ему мало ногу, того ради седе в ладию плывше до Смоленска и в урочище, Смядень глаголемое, приставшу ему ко брегу достиже тая весть Ярославова: “Не иди в Киев ко Святополку, понеже отец наш уже умре, Святополк же уби Бориса и тебе хощет убити”. Сию весть слышавши, святый Глеб много плакася по отце и убиением брате, мы же внемлюще сему благосердому плачу, от глубины души взываем святым страстотерпцем сице: Радуйтеся, земному отцу послушествоваше и любве Отце Небеснаго сподобистеся; радуйтеся, яко от отца земнаго Небесному Отцу сопричтостеся. Радуйтеся, велию любовь ко отцу своему земному даже до смерти своея неослабно имевшии; радуйтеся, любовию Небесною, аки огнем пламеневшии и ею в чертоги Отца Небеснаго притекшии. Радуйтеся, небеснаго утешения паче земнаго во псалмех Давидовых взыскавшии; радуйтеся, всякую земную радость презревшии.

Радуйтеся, Борисе и Глебе, великии и славнии страстотерпцы.

Вести о убиении брата Бориса пришедшей и сами убийцы от Святополка достигоша тебе, Глебе святый, и нападоша на ладию твою, ты же узрев разбойники тыя, воздев руце своя со слезами молящеся псаломскими словесы, якоже и Борис, сими спасительными словесы Давида Псалмопевца, егоже во святей купели Крещения наречен был еси: “Суди, Господи, обидящия мя, побори борющия мя, приими оружие и щит и востани в помощь мою; изсуни меч и заключи сопротив гонящих мя, рцы души моей: Спасение твое есмь Аз”. Посреде тоя молитвы трапезарь твой, имея вражду на тя, ем тя созади за главу, вонзе нож в гортань, аки агнца непорочна закланием предаде смерти. Да умягчит жестокая сердца наша Господь и наставит посреде сени смертныя воспевати, якоже и тии страстотерпцы, песнь хваления: Аллилуиа.

Витийство всякое суетных мудрецов века сего окаяннаго не постигнет и не разумеет доблественнаго страдания страстотерпец святых Бориса и Глеба, како сии юныя леты победиша страх смертный, како не прилежали миру, но Бога возлюбивше, Ему Единому всех себе предали есть, смерть приявши, хвалу воспевая Господеви; сего суетнии люди постигнути не могут, и врази Креста Христова сущи, Христа Бога уничижают, хулы глаголют и на святых Его, обаче не ведают Писания, яко Бог поругаем не бывает. Мы же, ублажая житие и кончину страстотерпец святых Бориса и Глеба, усердно им вопием: Радуйтеся, юродивую мудрость мира презревшии и горния мудрости взыскавшии; радуйтеся, в скорбех земных небрегшии и радость небесную обретшии. Радуйтеся, Агнца ради Христа, и сами в подобии агнцев заклание претерпевшии; радуйтеся, от мрака земнаго к Небесному свету устремившиися. Радуйтеся, горняго мира святии наследницы; радуйтеся, дольняго мира, по слову апостола, мудрии странницы.

Радуйтеся, Борисе и Глебе, великии и славнии страстотерпцы.

Спасению душ наших послужиша, мученицы святии, показаша бо нам, яко болезни тела Христа ради душу спасают и очищают от грехов. Темже молим вас, мученицы Христовы Борисе и Глебе, молитеся за ны ко Господу, спасите души наша предстательством своим, правдивая страстотерпца, и истинная Евангелия Христова послушателя, да молитвами вашими управляемии, достигнем Небеснаго Царствия и тако воспоем Господу Победителю смерти и ада: Аллилуиа.

Свет чудес и исцелений возсия от телес ваших, святии страстотерпцы, положенным бывшим мощем вашим в Вышгороде, первее под спудом, таже изнесенным от земли во храм, от брата вашего Ярослава созижденный; по мнозех же летех князь Мономах Владимир, храму каменну созданну бывшу, внесе в онь святая телеса ваша, чудесы сияющая. Сия благоговейне воспоминая, умиленно глаголем вам, святии: Радуйтеся, вместилища благодатных дарований Духа Божественнаго, Его же храмы нерукотворенныя телеса ваша суть; радуйтеся, сокровища благодати немощная врачующей, в телесех ваших пребывающей. Радуйтеся, даром благодати сия отроку скорчену имуще ногу, исцеление явлением своим подавшии; радуйтеся, слепцу прозрение даровавшии, и хромому отсечену ногу имущу и принесену бывшу к раце мощей ваших, ногу во единем часе во удивление всех зрящих возрастившии. Радуйтеся, жену некую, не почетшую дне святителя Николая, усушением руки вразумившии и по слезном покаянии у мощей ваших исцелившии; радуйтеся, тому же святителю Николаю поревновавшии, оклеветанных князю Михаилу неправедно мужей от темницы свободившии.

Радуйтеся, Борисе и Глебе, великии и славнии страстотерпцы.

Пения похвальная приносит вам, святии страстотерпцы, земля ваша от дней преставления вашего страдальческаго и до днесь, воздвигает храмы имени вашему, почитает дни страданий ваших, величается о имени вашем. Переяслав древний град отца вашего Владимира совершая во вся лета в память вашу крестная хождения по брегу реки Альты, на нейже святый Борис заклан бысть, радуется. Радуется и весь Бориспольская, яко весь Борисова нареченная вспоминанием страстей ваших. Сего ради в радости духовней вопием: возсия днесь преславная память ваша, страстотерпцы Христовы Романе и Давиде, созывающи нас к похвалению Христа Бога нашего, тем притекая к вам исцеления дар приемлем, вы же с лики ангельскими предстояще Святей Троице, молитеся спастися нам, поющим во умилении сердца Богу: Аллилуиа.

Страшную казнь прия от правосуднаго Господа новый Каин — Святополк, иже прозвание окаяннаго от потомства ему дадеся, по убиении бо страстотерпцев святых Бориса и Глеба и третияго брата Святослава умертвил есть, абие же по сих Ярослав собра вои, подвижеся ратию на Святополка и победив его на месте убиения Бориса святаго по мнозей молитве сицевой: “Кровь братий моих вопиет от земли к тебе, Владыко, Господи Боже мой, но молю Тя, Всеблагий Творче, Судие Праведный, отмсти кровь праведных сих, якоже кровь Авелеву на Каине, положив на него трясение, тако положи трясение и на сем окаяннем Святополке, яко да не возможет проливати более крове братния и христианския”. И бысть тако по молитве сей: стеня и трясыйся, якоже Каин, бежа Святополк чрез всю землю Ляшскую, вопия: “Се женут нас, бежите, бежите”, и в пустынех Ляхии и Чехии сконча живот свой. Ужасом одержимии, зря лютую кончину окаяннаго, вопием вам, мученицы святии: Радуйтеся, незлобиво смерть приявшии, научите смирению и нас, гордостию возносящихся. Радуйтеся, от властолюбия мученнии, свободите ны от духа любоначалия. Радуйтеся, не сопротив ставшии врагу, сущу брату вашему, дадите и нам крепость в несении скорбей; радуйтеся, не противльшиися злому ухищрению, ниспошлите и нам дивный дар терпения. Радуйтеся, крепости Божественной исполненнии, укрепите ны на пути спасения; радуйтеся, от соблазнов суетнаго мира отвергшиися, молитвами вашими нас вечнаго плача исхитите.

Радуйтеся, Борисе и Глебе, великии и славнии страстотерпцы.

Благодатию, данною вам от Бога, во еже помогати скорбящим и озлобленным, помощь даровали есте, святии, князю Александру на реце Неве противу свеев, виде бо вас при захождении солнечном воевода Филипп на реце посреди корабля стоящих и плывущих: “Гребцы же седяху аки мглою одеяни”, и слыша глаголание сие: “Брате Глебе, пойдем скоро да поможем сроднику нашему”, и во утрий день Александр победи враги и короля их уязви мечем в лице. Такожде и Димитрию во одоление Мамая явили есте помощь, воздвизая пети Богу сицевая Благодеющему: Аллилуиа.

Поюще ваша, святии страстотерпцы Борисе и Глебе, страдания, ублажаем ваше дивное непостижимое терпение и почитая святую память вашу, молимся вам: сохраните мирну страну нашу, великим отцем вашим святым Владимиром во Святем Крещении просвещенную, укрепите дух и руце православных, борющихся со мглою неправды, даруйте совершенную победу истины и света над тьмою неверия и безбожия и приимите похвальная сия: Радуйтеся, истинная Евангелия послушателя, даруйте и нам оное разумение Евангелия; радуйтеся, Закона Христова богописанныя скрижали, дадите и нам сего Закона разумное ведение. Радуйтеся, целомудрия хранителие от младости, научите и нас воздержанию плоти в веце сем прелюбодейнем и грешнем; радуйтеся, незлобия учителие, покажите и нам незлобия путь к Царствию Небесному. Радуйтеся, о убиении телесе небрегшии, дадите и нам мужество против убивающих тело, души же немогущих убити; радуйтеся, правую веру до конца сохраншии, обличите тыя, яже от веры отеческия правыя отпадают.

Радуйтеся, Борисе и Глебе, великии и славнии страстотерпцы.

О всехвальнии страстотерпцы Христовы Борисе и Глебе, во святей купели Крещения Романе и Давиде нареченнии, призрите с высоты небесныя на нас грешных, скорбящих и озлобленных, милости Божия и помощи требующих, слышите глас моления нашего, тепле вам возносимый и от всяких зол болезней и бед свободите ны. В час же кончины нашея укрепите слабеющий дух наш, да во исходе нашем от бреннаго сего тела, таможде, у дивнаго Престола Царя Славы, с лики ангельскими воспоем: Аллилуиа.

(Этот кондак читается трижды, затем икос 1 и кондак 1)

Молитвы святым и благоверным князьям и страстотерпцам Борису и Глебу

О двоице священная, братие прекрасная, доблии страстотерпцы Борисе и Глебе, от юности Христу верою, чистотою и любовию послужившии, и кровми своими, яко багряницею украсившиися и ныне со Христом царствующии, не забудите и нас сущих на земли, но яко теплии заступницы, вашим сильным ходатайством пред Христом Богом, сохраните юных во святей вере и чистоте неврежденными от всякаго прилога неверия и нечистоты, оградите всех нас от всякия скорби, озлоблений и напрасныя смерти, укротите всякую вражду и злобу, действом воздвизаемую от ближних и чуждых, Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте своим заступлением всех чтущих святую память вашу во веки веков. Аминь.

О двоице священная, страстотерпцы Борисе и Глебе! Не забудите нас, раб Божиих (имена), но яко заступницы, вашим сильным ходатайством пред Христом Богом нас помилуйте; от нечистоты сохраните, от скорби, озлоблений и внезапный смерти избавите. Испросите у Великодаровитаго Владыки нам оставление прегрешений наших, единомыслие и здравие. Снабдевайте заступлением вашим приход сей, дом (святый храм) сей и вся чтущия святую память вашу во веки веков.

Днесь церковная расширяются недра, приемлющи богатство Божия благодати, веселятся русстии собори, видяще преславная чудеса, яже творите приходящим к вам верою, святии чудотворцы Борисе и Глебе, молите Христа Бога, да спасет души наша.