Свт. Питирим Тамбовский
чудотворец
[10 августа
(28 июля ст. ст)]
Тропарь, глас 4
Веры
и благочестия наставниче, Церкве светильниче, монашествующим образе,
святителю Питириме премудре, стадо твое благочестно упасл еси, и ко
Христу привел еси, темже в вышних венцем славы украшен, с нами на земли
духом пребываеши, сияя чудесы. Моли Христа Бога спастися душам нашим.
Кондак, глас 8
Монахов
наставника изрядна и святителя всем людям милостива, чудотворца предивна
и молитвенника о нас неусыпна, сошедшеся воспоим Питирима, Тамбовския
земли похвалу.
Величание
Величаем
тя, святителю отче Питириме, и чтим святую память твою, ты бо молиши
за нас Христа Бога нашего.
Акафист
свт. Питириму,
еп.
Тамбовскому чудотворцу
Кондак 1
Избранный чудотворче и изрядный угодниче
Христов, святителю отче Питириме, всем притекающим к тебе скорый помощниче!
Сподоби нас недостойными усты воспети тебе похвальная сия. Ты же, яко
имея велие дерзновение ко Господу, от всяких нас бед свободи, зовущих:
Радуйся, Святителю Питириме,
Тамбовский чудотворче.
Икос 1
Ангелом подражатель и человеков наставник
был еси, святителю отче Питириме: от юности бо возлюбил еси Божественное
учение и, сему последовав, доброму житию поревновал еси. Сего ради тебе,
на Небеси и на земли прославленному, вопием сице:
Радуйся, от рождения твоего Богом избранный; радуйся
на служение апостольское призванный.
Радуйся, избранние твое подвигом благочестия оправдавый;
радуйся, образом жития твоего и нам путь к Небеси показавый.
Радуйся, от юности иго Христово возлюбивый; радуйся,
чистоту сердца твоего до конца сохранивый.
Радуйся, яко сего ради, еще на земли сый, Ангелом
уподобился еси; радуйся, яко сего ради Господа Славы выну зрети сподобился
еси.
Радуйся,
Святителю Питириме, Тамбовский чудотворче.
Кондак 2
Видя, Благопромыслитель Господь, души твоея
доброту, направи помысл твой ко исканию динаго на потребу. Ты же, сего
возжелев, еще из детства навыкл еси непрестанно взывати к Богу: Аллилуиа.
Икос 2
Разум божественный имый, всю суету привременныя
сласти презрел еси, отче Питириме: темже оставив мир и яже в нем, измлада
приял еси образ ангельский, всего себе отдав на служение единому Господу.Таковое
убо изволение твое восхваляюще, глаголем ти сицевая:
Радуйся, яко путь правый в Царствие Небесное обрел
еси; радуйся, яко сим путем невозвратно шел еси.
Радуйся, яко красная мира сего ни во чтоже вменил
еси; радуйся, яко земная отринув, Небесная возлюбил еси.
Радуйся, сердце твое присно ко Христу имевый; радуйся,
Тому единому служити вожделевый.
Радуйся, разум твой в послушание веры пленивый;
радуйся, в Бозе благочестно поживый.
Радуйся, Святителю Питириме, Тамбовский
чудотворче.
Кондак 3
Силою Божией укрепляемь, отче Питириме, вся
послушания монастуркая добре проходил еси в Вяземской обители святаго
Предтечи, емуже подражал еси подвиги твоими, всегда взывая к Подвигоположнику
всех, Спасу Христу: Аллилуиа.
Икос 3
Имея помысл чист и душу непорочну, священства
благодать еще млад сый, достойно восприял еси, отче Питириме; темже
во игумена обители избран был еси и саном архимандррита почтен, ревностно
подвизаяся о спасении Богом тебе врученнаго стада словеснаго. Сего ради
вопием ти сице:
Радуйся, яко вся послушания иноческая неленностно
прошел еси; радуйся, яко сими на высоту добродетелей возшел еси.
Радуйся, красото смиренномудрия и воздержания; радуйся
образе кротости и послушания.
Радуйся, целомудрия ревнителю, радуйся, девства
и чистоты хранителю.
Радуйся, иночетвующих мудрый начальниче; радуйся,
всех благочестно жити хотящих добрый наставниче.
Радуйся,
Святителю Питириме, Тамбовский чудотворче.
Кондак 4
Бури злословия и людскаго мятежа не убоялся
еси, отче Питириме, егда икону преподобнаго Аркадиа, недобре писанную,
почитания лишил еси. Темже о правоверии ревнуя, поучал еси паству твою
право взывати к Богу: Аллилуиа.
Икос 4
Слышав и видев премногую твою добродетель,
блаженный патриарх Иоаким святителя тебе нарече и паству Тамбовскую
смотрению твоему вручи. Мы же, о сем веселящеся, глаголем ти сицевая:
Радуйся, вся степени иноческаго звания с честию
прошедый; радуйся, на престоле святительском достойно возседый.
Радуйся, страже Церкве Христовы неустрашимый; радуйся,
делателю винограда Христова неутомимый.
Радуйся,
благовременне и безвременне паству твою поучавый; радуйся, ко Христу
овцы заблуждшия призвавый.
Радуйся, люди во тьме сидящия, светом Христовым
озаривый; радуйся, с им от погибели их сохранивый.
Радуйся,
Святителю Питириме, Тамбовский чудотворче.
Кондак 5
Боготечное светило , путь жизни твоея озаряющее,
бысть тебе угодник Божий Прокопий, его же именем во святем крещении
наречен был еси и к нему же присно с молитвою прибегал еси, поя Богу:
Аллилуиа.
Икос 5
Видел еси, отче Питириме, твоима очима угодника
Божия Прокопиа, предстояша пред лицем Господа и к Нему моляшася сице:
«Бессмертный Боже, хвалу Тебе воздаю, Царь бо един еси всем: помулуй
душу его и сподоби сего Царства Небеснаго». Сего ради и мы взываем к
тебе: не престай молитися о всех нас купно со Прокопием блаженным, да
и нас сподобит Господь достигнути Небеснаго Царствия. О сем воздыхающе,
похвальная воспеваем ти:
Радуйся, очеса твоя выну на небе возводивый; радуйся,
славу Небесную паче всего возлюбивый.
Радуйся, непрестанными молитвами сердце твое освятивый;
радуйся, мысль твою в Бозе утвердивый.
Радуйся, яко Прокопиа святаго молитвенника дерзновеннаго
выну имел еси, радуйся, яко сему споспешествующу, в радость Господа
твоего вшел еси.
Радуйся, яко в райских обетелех ныне пребываеши;
радуйся, яко от горних высот и на с многогрешных милостивно назираеши.
Радуйся,
Святителю Питириме, Тамбовский чудотворче.
Кондак 6
Проповедник веры православныя и ревнитель
благочестия словом и житием твоим был еси, святителю Питириме. Темже
духовная паства твоя непрестанно памятует и вся Российская страна достойно
ныне прославляет труды твоя, имиже трудился еси, присно взывая ко Господу:
Аллилуиа.
Икос 6
Возсиял еси во Церкви Тамбовстей светом Христова учения и ревностию
твоею о славе Божией, святителю отче Питириме: ты бо красоту Господню
возлюбив, о устроении храмов святых и о благочинии церковнем всеусердно
прилежал еси. Сего ради воспеваем ти сице:
Радуйся,
славы Христовы ревнителю; радуйся, храмов святых строителю.
Радуйся, благочиния церковнаго строгий блюстителю;
радуйся чтения и пения церковнаго искусный учителю.
Радуйся, яко тобою Церковь Русская благоукрасися;
радуйся, яко в ней вера Христова и тобою утвердися.
Радуйся, града Тамбова славо и украшение; радуйся,
всем нам защито и ограждение.
Радуйся,
Святителю Питириме, Тамбовский чудотворче.
Кондак 7
Хотяй невозбранно возноситися духом в Горняя
селения, безмолвие пустыни возлюбил еси, отче Питириме, идеже многи
дни в посте и молитве подвизался еси, овогда же со святителем Митрофаном,
другом твоим, беседовал еси, воспевая с ним купно хвалебную песнь: Аллилуиа.
Новую обитель в месте пустыннем, якоже тихую
пристань, во славу Предтечи Господня создав и в самом граде Тамбове
с сестрою твоею Екатериною обитель женскую устроив, сим явил еси нам,
отче Питириме, велию твою любовь ко обителем святым. Сего ради воспеваем
ти похвальная сия:
Радуйся, Предтечу Господня возлюбивый и тому в житии
твоем поревновавый; радуйся, строгий подвиг благочестия в себе показавый.
Радуйся, пустыни безмолвия любителю; радуйся, поста
и молитвы строгий блюстителю.
Радуйся, тамбовския дебри и леса молитвою твоею
облагоухавый; радуйся, обитель иноком там основавый.
Радуйся, святителя Митрофана друже и собеседниче;
радуйся, во Царствии Небесном тому сонаследниче.
Радуйся,
Святителю Питириме, Тамбовский чудотворче.
Кондак 8
Странника и пришельца в мире сем помышлял
еси себе, отче Питириме. Темже Небесная возлюбив, сокровище некрадомое
сокровиществовал еси, грядущаго града взыскуя и ко Господу радостно
взывая: Аллилуиа.
Икос 8
Весь исполнь любве Христовы, душу твою за
овцы твоя положити готов был еси, спасение всем устрояя и всем во всем
угождая, не иский своея, но многих пользы, да всяко некия спасеши. Сего
ради чтим святую память твою и усердно вопием ти:
Радуйся, отче благосердый, о спасении многих ревновавый;
радуйся, не своих си, но ближняго искавый.
Радуйся, пастырю добрый, на пажитех тучных чада
твоя духовная питавый; радуйся страже неусыпный, от волков хищных овцы
твоя охранявый.
Радуйся, нищих кормителю и гладных питателю; радуйся
сирых защитниче и обидимых предстателю.
Радуйся, яко и ныне во всяких нуждах скоро нам помогаеши;
радуйся, яко и ныне всех, с верою к тебе притекающих, милостивно утешаеши.
Радуйся,
Святителю Питириме, Тамбовский чудотворче.
Кондак 9
Всяк возраст
и всяко сословие еще в житии твоем величаху тя яко человека Божия, и
в час кончины твоея вся паства твоя плакаше о тебе, яко об обце своем.
Зрящи же тя погребаема и новаго предстателя на Небеси имети уповающи,
с рыданием, купно же и благодарным сердцем возглашаше о тебе надгробную
песнь: Аллилуиа.
Икос 9
Ветийство человеческое не довлеет ко прославлению
многих чудес твоих, святителю Питириме: новая бо купель силоамская открыся
всем страждущим во источнице твоем, рукама твоима ископаннем; таже и
риза твоя честная, на недужная полагаема, дарует им исцеление, и гроб
твой святый явися воистину неоскудная врачебница: никто же бо с верою
к нему притекаяй, тощ и неутешен отходит. Сего ради гласы хвалебными
тя славим:
Радуйся, врачу безмездный, туне врачевания всем
подаваяй; радуйся, сосуде драгоценный, целебное миро всем верным богато
изливаяй.
Радуйся, глухих слышание и слепых прозрение; радуйся,
хромых хождение и сляченных исправление.
Радуйся, расслабленных укрепителю; радуйся, бесноватых
от насилия диавольскаго свободителю.
Радуйся, лишенным смысла ум здравый подаваяй; радуйся,
в сониих и видениих помощь твою являяй.
Радуйся,
Святителю Питириме, Тамбовский чудотворче.
Кондак 10
Спасти хотя паству твою, отче Питириме, не
судил еси ведети в ней ино что, точию Христа и Сего распята. Сего ради
поставил еси образ распятия Господня, знамение нашего спасения, на вратех
града, да вси мимоходящии покланяются ему, воспевающе хвалебную песнь:
Аллилуиа.
Икос 10
Стены необоримыя и Заступницы рода христианскаго
икону дивную граду Тамбову даровал еси, отче Питириме, от неяже доднесь
всем с верою приходящим токи чудес изливаются. Сего ради благодарне
взываем ти сице:
Радуйся, все упование твое на Матерь Божию возложивый;
радуйся, и град твой покрову Тоя вручивый.
Радуйся, икону Ея святую в щит и ограждение граду
поставивый; радуйся, залог любве твоея - икону Богоматере пастве оставивый.
Радуйся, яко иконою тою чудеса многа содеваются;
радуйся, яко милости Божия от нея непрестанно изливаются.
Радуйся, Богородицу нам указавый от всех бед избавление;
радуйся, яко милостию Ея ты еси наша радость и утешение.
Радуйся,
Святителю Питириме, Тамбовский чудотворче.
Кондак 11
Пение немолчное даже доднесь совершается
у святей иконы твоей, угодниче Божий Питириме: мнози бо в нуждах сущии,
ведят тя помощника благопоспешлива и молитвенника благоуветлива. Темже
ныне вся Российская земля благодарне вопиет прославльшему тя Богу: Аллилуиа.
Икос 11
Светильник светозарен был еси в земнем житии
твоем, отче наш Питириме, благодатно озаряя души верных. Просвети убо
молитвами твоими очи душевныя и нам, в пучине греха погибающим, да благодарне
вопием ти:
Радуйся, великий угодниче Божий, благочестную жизнь
на земли возлюбивый; радуйся, веру, надежду и любовь даже до конца сохранивый.
Радуйся, светильниче многосветлый, светом истиннаго
Богопознания нас озаряяй; радуйся, луче Солнца Правды Христа, теплотою
Божественныя любве души наша согреваяй.
Радуйся, бисере честный, сиянием Небесныя Славы
сердца наша увеселяяй; радуйся, каменю драгий, страну нашу православную
украшаяй.
Радуйся, яко тобою бездну милосердия Божия призываем;
радуйся, яко тобою спасение вечное получити уповаем.
Радуйся,
Святителю Питириме, Тамбовский чудотворче.
Кондак 12
Благодать от Бога ти данную ведяще, ныне
прилежно молим тя, святителю Питириме: пролей теплую о нас молитву ко
Господу, да сохранит Церковь Свою Святую неврежденну от ересей и расколов,
и вся православныя да помилует и спасет, вопиющия Ему: Аллилуиа.
Икос 12
Поюще твое богоугодное житие, отче Питириме,
и на Небеси от Бога прославление, величаем безчисленная чудеса и исцеления
твоя, и на неусыпныя молитвы твоя уповающе, взываем ти сицевая:
Радуйся, храм Преображения Господня благолепен устроивый;
радуйся, вечное покоище себе в нем предуготовавый.
Радуйся, житие твое земное благочестно скончавый;
радуйся, от Царя Небеснаго венец славы приемый.
Радуйся
апостолов собеседниче; радуйся, святителей сопрестольниче и сонаследниче.
Радуйся, Ангелов и Архангелов сослужителю; радуйся,
всех Небесных Сил сожителю.
Радуйся,
Святителю Питириме, Тамбовский чудотворче.
Кондак 13
О преславный чудотворче, угодниче Божий Питириме!
Приими сие от любве нашея приносимое тебе благохваление, и твоим благоприятным
ходатайством избави нас от всяких бед и зол, от внезапныя смерти и будущия
муки, да сподобимся купно с тобою во веки пети: Аллилуиа.
Сей
кондак чтется трижды, затем икос 1 и кондак 1
Молитва
святителю Питириму, Тамбовскому чудотворцу
О
великий угодниче
Божий и преславный чудотворче, святителю Питириме! К тебе смиренно припадаем
и усердно молимся: яви нам грешным любовь твою отеческую и многомощное
твое заступление. Веруем бо, яко велие дерзновение имаши ко Господу
и яко много может предстательство твое пред Престолом благости Его.
Сохрани молитвами твоими Церковь Святую от ересей и расколов, от суеверия
и неверия. Испроси нам веру праву, надежду несумненну, любовь нелицемерну,
в добрых делех преспеяние, в искушениих мужество, в злостраданиих терпение,
в молитвах постоянство, мир и благоустроение стране нашей, здравие же
и спасение людем ея.
Призри
милостивно на предстоящия и молящияся пред святою иконою твоею и вся
прошения их во благо исполни и всем вся в жизни временней потребная
даруй, во славу дивнаго во святых Своих Бога в Троице славимаго и покланяемаго,
Отца и Сына и Святаго Духа, ныне и присно и во веки веков. Аминь.
Версия для печати doc/rar
73K